Ciau Ninu, Fara e Vice
È sempri nu piaciri discùtiri u sport, u palluni nenti menu.

Nun aviti a pinzari ca ju nun canusciu stu jocu bonu, u jucai quannu
era cchiù giòvani e haiu assicutatu ogni campiunatu munniali nzinu
di chiddu dû 1974 (chi pi cuincidenza vinni jucatu `n Girmania – si
mi ricordu bonu, l'Italia pirdìu la sò ùrtima partita contra la
Pulonia, e nun jìu avanti ntô secunnu round).

Pi mia, sta vitturia nun m'havi datu la stissa cuntintizza chi
sintìi quannu l'Italia vincìu l'ùrtima vota ntô 1982. Criu ca mi
sentu daccusì pi sti raciuna:
1. Ntô 1982 mi pari ca l'Italia era viramenti dignu d'èssiri
chiamata lu campiunatu dû munnu. A ddu viaggiu, appi a vinciri
contra l'Argintina, Brasili, Pulonia e poi la Girmania (ovest), e
dunca putemu diri ca mirtau sta laudi pi daveru.

2. Nun pozzu suppurtari l'idia ca nu campiunatu si pò vinciri chî
rigura. Pi mia, la partita s'havi a vinciri ntra dui urati di jocu –
supratuttu, pi dicìdiri u campiunatu dû munnu! Nun mi piacìu ca
vinni dicisu daccusì ntô 1994 (di Brasili contra l'Italia a dda
vota) e nun mi piaci ora.

3. Lu scànnalu dû cauciu talianu accamora è una cosa, ma poi stu
fattu ca forsi Matterazzi dissi quarchiccosa schifusa a Zidane è
nautra cosa ancora. Ju nun pozzu suppurtari stu tipu di
cumpurtamentu ntô sport. Avemu già scurdati chî abbinìu st'annu
passatu a Missina?

Addunativi ca puru li giurnali taliani dìssiru (prima dâ partita
contra l'Australia, quannu tutti li taliani cci pinzàvanu na cosa
fàcili) ca nta l'Australia s'attròvanu quantu campi di sport ca cci
nni sunnu di cresî `n Italia! Nuiatri capemu bonu bonu u sport.
Capemu bonu bonu ca puru siddu l'Italia e la Francia meritàvanu a
ncuntraricci pi finali, ca ognirunu nun jòcanu u sport comu avissi a
èssiri jucatu (secunnu a nuiatri).

Ninu havi raciuni ca ddu fallu nun era riguri (chi Zidane signau) –
ma pi mia, stu fattu suttalinia nu prubbrema granni cu stu jocu – cu
picca riti, significa ca nu sbagghiu d'un àrbitru pò ditirminari la
partita – mirtata o no. Aviti a pinzari ca nni l'anni 1950,
cc'èranu 5,5 riti ogni partita (e cc'èranu picca pareggi), e pî
finali già cunchiusi, cc'èranu sulamenti 1,6. Si tratta d'un
ndrizzu chi nun mi piaci assulutamenti. Secunna a mia, FIFA havi
assai di fari pi giustari e abbisari stu jocu munniali.

Salutamu
pippu d'angelo, canberra