Ciau Pieru,
e grazii pp'a rrisposta. Vidi, iu nun sacciu mancu cchi ssunu i
puisìi de carritteri, sugnu un giovani di 22 anni e ll'amuri ppi la
lingua mia m'ha vinutu sulu e spuntaniu, e l'amu sta terra e n'ha
sacciu abbannunari, tantu che iu o Bbelgiu, coma a ttia, nun putissi
stari. Nun fraintindemuci però: iu sungu un carusu ca ha viaggiatu
assai n'ta so vita, e l'Europa l'haiu vistu in lungu e in largu
(tornu appena di la Spagna). Ma appena ca cumincia la terza simana
di luntananza, staiu mali ca sulu cu cci passa pò capiri quantu.
Li unici me maestri su dui: Nino Martoglio, datu ca ma nonna, già
quann'era picciriddu picciriddu mi liggiva 'u cupiuni
di "Mastr'Austinu", ovveru san Giuvanni dicullatu, e poi, già cchiù
ranniceddu, Salvo Basso, ormai bon'arma, che m'ansignau un saccu di
cosi, ca iu lu canusciu comu i ma sacchetti, ma iddu propriu nun
sappi cu fussi iu (ma è na storia troppu longa, ca cci putissimu
scriviri un film). St'urtimu fu macari chiddu ca mi fici amari la
puisìa siciliana, e cridu ca la mia scrittura, nti stu sensu, e
assai sìmili a chidda sò. V'allegu du' puisìi, ma non chiossài, ni
vàiu gilùsu. Autri, suddu vi piacissiru, datu ca pueta nun sugnu, ma
lu fazzu, basta ca mi cuntattati ppi e-mail o in privatu, mi diti u
mutivu, e forsi vi fazzu leggiri;-)

La virità è che mi piacissi ca c'interissassuru a cuarcunu di
mistèri, ca mi putissi ajutari a farici corcosa.



PPI SBAGGHIU

Ogni du' uri mi fermu a parrari ccu genti
ca nenti ni vola sapiri di tutta sta storia,
ci manciunu, sulu ppa gloria, si fanu pisanti.

Dumani mi pigghiu na pinnula, oggi
nun parru, oggi, taliu da finestra e un cristianu
puggiatu, n'on muru luntanu, nun s'innacorgi.

Se ogni du' uri figghiàssi di sti pinsera
poviru pazzu 'i ggalèra, m'arriggittàssi.



I PAROLI

I paroli s'ancontrunu, si mmiscunu,
fanu puisia. Su cannìli di cira
ca se i usi tropp'assai, poi scumparunu
si ccapunu e nun serbunu.

I paroli si cchiappunu, si strinciunu
e si vasunu. Se futtunu ni nascia
na parrata di du sordi o un saggiu
filosoficu, cu na cuda fatta 'i pagghia.

I paroli s'affruntunu, ora pungi
e si ritirunu, ca ti chiantunu un gran cauciu
e ti bbiunu nta l'angulu
e ti fanu l'occhi 'i diavulu.

I paroli su pitruzzi, su cuticchi
senza pizzi, ca se i tiri belli jauti
iddi arrivunu luntanu,
nti l'aricchi di li fimmini.