----- Original Message -----

From: a_z_0_2_8

To: Linguasiciliana@yahoogroups.com

Sent: Friday, May 18, 2007 8:06 PM

Subject: [Linguasiciliana] A SARTINA DI LA STRATA O TUNNU (puisia)

A SARTINA DI LA STRATA O TUNNU

'Ntà la strata di lu Tunnu, a 'cantunera,
'cchiù sutta a lu Spiziali, a manu ritta,
ci stà na bedda figghia custurera,
ca pari 'nà bannera quantu è dritta.

'Ccù li capiddi a moda masculina,
e lu cozzu rarutu 'ccù mastria,
stapi affacciata di la sò vitrina,
e fà' sfurriari u senzu a què a talìa.

Quannu nesci lu ferru 'p'avvampari,
tutta la strata jnghi di faiddi,
ca cuè ca passa lu fa 'nnammurari,
'ccù la sò lisciatedda di capiddi.

Di lu matinu 'nzinu all'Avimaria,
'nzumma, appena 'grapi 'ddà vitrina,
'ccumenza na passiata 'ntà 'ddà via,
e 'ncutta cala e acchiana sta catina.

Puoi, nun vi cuntu. a notti 'ntò quartieri,
'ccù musica, chitarra e 'ccù viulinu,
iu mi vaiu a mettu e quattru cantuneri,
e quannu è lu me turnu m'arriminu.

'Ccì passu tutti i jorna allammicatu,
'ccù forbici, pinzeddu e sapunettu,
spirannu d'idda d'essiri chiamatu,
almenun 'ppì raririci u cuzzettu.

Ora lu sapi, e fà la risatedda,
mentri 'ccù la so forbici ritagghia,
ed iu 'ntuonu 'ccà, 'ntra li cirivedda,
mi pari ca 'ddà forbici li tagghia.

Ca 'bona la sturiasti sartinedda!
Ti criri fari pani 'ccù 'ssù luci?
Tu 'ccù 'ssà 'ngannusa risatedda,
duni a 'ccù ti guarda la sò cruci.

Si bedda, u sacciu: e bedda è sta jurnata,
e tutti l'aceddi su sciuti a cantari.
Dumani forsi agghiorna annuvulata,
e nuddu d'iddi si viri affacciari.

Ca pensaci, figghiuzza, 'ppì dumani!
Ca chisti sunnu jochi di natura.
Siddu m'ascuti, allura u trovi 'ncani,
sinnò tu fai di pezza a 'tò musura.

Ciao, Paolo.