U CARRITTIERI ‘NTIEMPU RI VIGNIGNA

 

U carrittieri si susi prestu, a ‘mmatinata,

‘mpaia lu cavaddu suou ciancianiddaru,

lu cumpleta ri tutti quanti li sò armigghi,

carica i varila e ‘ncugna rittu ‘ppà campagna.

 

U suli assuma a galla ro mari ri Pachinu,

tingiennu li tirrina di oru supraffinu.

U carrittieri, allegru, arriva ‘ntà la vigna,

cantannu na canzuna d’amuri ri vignigna.

 

I vignignatura all’antu, cuogghiunu ‘racina,

inciennu li cruveddi ‘ncugnati a curma cina.

Appena lu massaru  cumanna i carricari,

tutti ‘cchè cruveddi a spadda, vanu a sduvacari.

 

U pisaturi, ‘ccù li sò scarpunazza, pista la racina:

la spala ‘ncuostu a n’angulu e l’ammacia fina, fina.

Quannu è ‘pistata tutta, l’abbìa rintra o ‘rituornu,

e ‘torna a ‘ppistari, stannu attentu a nunn’ascivulari.

 

U carrittieri, ‘ntantu, arriva o palummientu,

e scarica li varila, ‘ppì lu ‘riempimientu.

Li inci ri mustu russu vivu ca firmenta,   

li carica ‘ntò carrettu e ‘vvà a la cantina.

 

‘Mmentri travasa ‘ntà li utti u mustu re varila,

na scumazzata ‘rrussa ‘ccì scula ‘ntà catina,

e ‘nciumi ri sudura ‘ccì ‘mperlunu la frunti.

U carrittieri và e ‘vveni, cantannu a lu vientu.

 

A tramuntata o suli, torna a casa ‘ccù stanchizza,

sparannu a ‘zzotta all’aria, ‘ppì tanta cuntintizza.

Allegru va ‘ntunannu sturnelli a sò cumpagna,

e ‘dintra  a lu so cori, nun ‘viri l’ura r’abbrazzarla.