MATINATA MASSARIOTA

 

Canta lu jaddu, ‘mentri li stiddi parunu

spersi sutta u mantu di la luna,

ca li  cummogghia  comu picciriddi,

ci fa la vò, e li curca a una, a una.

 

Resta ‘ncielu ‘na frisca muragghia,

e ‘nmanu, ‘nmanu  ca s’affaccia a jancura,

versu lu livanti, in ‘nquarchi banna,

si viri saittari na chiazza di chiarura.

 

L’alludula, ucieddu matinaluoru,

‘ncigna ‘ppì ‘primu lu suli nascenti,

arrisbigghiannu, ‘ccù li sò aluzzi d’oru,

li mannari, unn’agghiacciunu l’armenti.

 

E ‘ciamunu li vacchi a li vitieddi,

‘mentri i crapuzzi,  ‘ntenti a masticari,

lassunu li pazzigni e vivuli ciarieddi,

‘duoppu na nuttata misi a ‘llammicari.

 

U picuraru s’allesti e fà u lassa e pigghia:

ad una, ad una li piecuri ‘ngagghia,

u latti di li minni si ‘ccì pigghia,

e sò mugghieri lu coci e lu quagghia.

 

‘Ppuoi, ‘mmarda lu sceccu, ‘rapi la grara,

 e fa nesciri di l’agnuni la jaddina,

ca carcariannu ciama la massara,

e  pritenni la ‘mpastata di matina.