MADONINA

A disen la canzon la nas a Napoli
e certament g'han minga tutt'i tòrt
Sorriento Margellina tutt'i popoli
i avran cantaa almen on milion de vòlt
Mi speri che se offenderaa nissun
se parlom un cicin anca de nun.

O mia bella Madonina che te brillet de lontan
tutta d'òra e piscinina ti te dòminet Milan.
Sòtta a ti se viv la vita
se sta mai coi man in man.
Canten tucc: "Lontan de Napoli se moeur"
ma poeu vegnen chì a Milan...

Adess gh'è la canzon de Roma magica,
de Nina er Cupolone e Rugantin
Se sbatten in del Tever, ròba tragica
esageren, me par on cicinin
Sperem che vegna minga la mania
de mettes a cantà: "Malano mia!".

O mia bella Madonina che te brillet de lontan
tutta d'òra e piscinina ti te dòminet Milan.
Sòtta a ti se viv la vita
se sta mai coi man in man.
Canten tucc: "Lontan de Napoli se moeur"
ma poeu vegnen chì a Milan...

Si, vegnì senza paura
num ve slongaremm la man
tutt el mond a l'è paes, a s'emm d'accòrd,
ma Milan, l'è on gran Milan


LASSA PUR CH'EL MOND EL DISA

Se sa che a parlà de Milan se fa minga fadiga,
con tanti argoment per i man el discors el scarliga
ciapèm per esempi i semafor che grand meraviglia
te par de vedè tanta gent a ballà la quadriglia

Lassa pur ch'el mond el disa ma Milan l'è un gran Milan
Pòrta Cicca e la Bovisa che d'intorni pròpi san
e la nebbia che bellezza, la va giò per i polmon
e quand fiòcca che gioia gh'é el parco e i bastion
per scià senza andà al Mottaron
fa nagòtt se poeu pieuv e andemm giò a tomburlon
in la puccia a puccià el panetton.

Se sa che a Milan gh'é in progett la metropolitana
però ògni dì sto progett semper pu el se 'lontana
in cambi num s'em che in pittura Milan la fa scoeula
gh'è d'intorna domá cartellon del formagg Gorgonzoeula.

Lassa pur ch'el mond el disa
ma Milan l'è un gran Milan
el Carrobi e la via Brisa el carrett di ciapa can
se te ve sul Montemerlo par de vess a San Vincent
còssa l'è Montecarlo, San Remo, Menton in confront
de l'Olona e el Tombon a Paris gh'è la Senna e'l Danubi
l'è blu ma a Milan gh'è el Navili e poeu pù.

Lassa pur ch'el mond el disa
ma Milan l'è un gran Milan
on bel piatt de busecca con dent i borlòtt
on oss buss cont intorna el risòtt
on litròtt de quel bon cont on bel minestron
fan content ògni milaneson.



NOSTALGIA DE MILAN

Stasera sont in vena de fa el sentimental
la nòtt l'è insci serena ma mi me senti mal!
Te scrivi cara mama, sont stuff de restaa chì:
el me Milan el me ciama visin a ti!

O mama mia mi sont lontaan,
ma g'hoo la nostalgia del mè Milan;
mi voraria turnà doman:
t'el giuri, curaria col coeur in man!

Vedè la Madonina, sentì el mé bell dialett,
svègliass ona mattina in del me lett!
O mama mia, inscì lontan,
t'el giuri, piangiaria puur de vess a Milan!

La par 'na stupidada se pensi ai mè bastion,
e foo 'na sifolada per cascià giò el magon!
E quand ven giò la sira ricòrdi i bei tosann,
rivedi la ringhera di mè vint'ann!

O mama mia mi sont lontaan,
ma g'hoo la nostalgia del mè Milan;
mi voraria turnà doman:
t'el giuri, curaria col coeur in man!

Vedè la Madonina, sentì el mé bell dialett,
svègliass ona mattina in del me lett!
O mama mia, inscì lontan, t'el giuri, piangiaria
pur de vess a Milan!