Me seri ripromessa, in memoria del carissimo scior Nonno Angelo, de
scomincià a scrivv in milanès.
L'è minga assèe, l'è mai assè per el noster Nonno.
Impunemanch el voeuri regordall cont una quaj poesia del Carlin Porta
sora el nost Milàn, sora la nostra città che el Nonno tanto amava.
Speri ch'el ghe piaserà.


EL SARA VERA FORS QUELL CH'EL DIS LU

El sarà vera fors quell ch'el dis lu,
che Milan l'è on paes che mett ingossa,
che l'aria l'è malsana, umeda, grossa,
e che nun Milanes semm turlurù.

Impunemanch però el mè sur Monsù
hin tredes ann che osservi d'ona cossa,
che quand lor sciori pienten chì in sta fossa
quij benedetti verz no i spienten pù.

Per ressolv alla mej sta question,
Monsù ch'el scusa, ma no poss de men
che pregall a adattass a on paragon.

On asen mantegnuu semper de stobbia,
s'el riva a mangià biava e fava e fen
el tira giò scalzad fina in la grobbia.




I PAROLL D'ON LENGUAGG, CAR SUR GORELL (1812)

I paroll d'on lenguagg, car sur Gorell,
Hin ona tavolozza de color,
Che ponn fa el quader brutt e el ponn fa bell,
Segond la maestria del pittor.

Senza idej, senza on cervell
Che regola i paroll in del descor,
Tutt i lenguagg del mond hin come quell
Che parla on so umilissem servidor.

E sti idej, sto bon gust, già el savarà
Che no hin privativa di paês,
Ma di coo che gh'han flemma de studià :

Tant l'è vera, che, in bocca de usciuria,
El bellissem lenguagg di Sienês,
L'è el lenguagg pu cojon che mai ghe sia.




RICCHEZZ DEL VOCABOLARI MILANES

Oh quante parentell han tiraa in pee
per nominà i cojon! Gh'han ditt sonaj,
toder, granei, quattordes sold, badee,
zeri, testiccol, rosc, ball, baravaj;

Gh'han ditt oeuv senza guss, bartolamee,
barlafus, fasoritt, menus, coo d'aj,
signori de cittaa, zeder, campee,
barole, ballauster e coraj.

Gh'han ditt gandoll, frittur, pes, contrappes,
segond nodar, ballottol, bicciolan
e (no soo perché coss) fin verones.

E adess in grazia de Madamm Bibin
gh'è paricc che i domanden i Bonsan,
e la massima part i Gherardin.