Semper in omagg al caro Nonno Angelo, alter duu poesii del Carlin
Porta:


Già che voeuren che improvvisa

Già che voeuren che improvvisa
quatter vers in meneghin,
sont chì pront a dàgh de frisa
al s'ciaror di lampedin.

Foo poeu cunt che l'è manch maa
a passà per on badee
che a passà per desgarbaa
e per porch drizaa sù in pee.

Scià vojemen on biccer
che senz'olter compliment
volti subet el penser
ai mej mòbel chì present.

Bevi donca alla salud
de sti cinqu senza braghetta
che hin prezios pussee che i scud
in sto secol de bolletta.

Preghi el ciel che per cent agn
mi je conserva come adess
semper luster grass e stagn
semper viscor come pess.




MARCANAGG I POLITEGH SECCA BALL

Marcanagg i politegh secca ball,
cossa serv tanc descors, tance reson?
Già on bast infin di facc boeugna portall,
e l'è inutel pensà de fa el patron;

e quand sto bast ghe l'emm d'avè suj spall
eternament e senza remission
cossa ne importa a nun ch'el sia d'on gall,
d'on'aquila, d'on'oca, o d'on cappon.

Per mì credi che el mej el possa vess
El partii de fa el quoniam, e pregà
De no barattà tant el bast despess,

se de nò, col postà da on sit all'olter
i durezz di travers, reussirà
on spellament puttasca e nagott olter.