DE TANT PISCININI CHE L'ERA
(Enrico Molaschi)

De tant Piscinin che l'era
De tant piscinín che l'era
el ballava volentera
el ballava in sú on quattrin
cont insèmma el fradellin
che '1 pareva on pigottin
de tant che l'era piscinin
de tant che l'era piscinin.
Coi bacchètt d'ona fassinna
l'ha fàa on tavol de cusinna
n'ha 'vanzàa ancamò on cicin
l'ha fàa foeura el sgabellin
per mètt sú i sò bej pescin
de tant che l'era piscinin
de tant che l'era piscinin.
Con 'na brassa de fustàgn
l'ha fàa foeura tutt i pagn
n'ha 'vanzàa ancamò on cicin
l'ha fàa foeura el gilerin
de mètt sú al sò fradellin
con fàa dent el saccoccin
per mètt dent l'orologin
de tant che l'era piscinin
de tant che l'era piscinin.
Con 'na brassa de tarlis
l'ha tajàa dusent camis
n'ha 'vanzàa ancamò on cicin
l'ha fàa foeura i manscionin
de mètt sú al sò fradellin
de tant che l'era piscinin
de tant che l'era piscinín.
On di giust cont on quattrin
l'ha fàa foeura on caldarin
n'ha 'vanzàa ancamò on cicin
l'ha fàa foeura on padellin
per rostigh el fideghin
ghe ne dava al fradellin
de tant che l'era piscinin
de tant che l'era piscinin.
Cont on sigher de Cavour
l'ha fumàa quarantott'ôr
n'ha 'vanzàa ancamò on cicin
ghe n'ha dàa al sò fradellin
che '1 casciava el sò fumin
de tant che l'era piscinin
de tant che l'era piscinin.
Cont on pugn soltant de terra
l'ha fàa foeura on camp de guerra
n'ha 'vanzàa ancamò on cicin
l'ha fàa foeura sètt fortin
per mètt dent i soldarin
comandàa dal fradellin
che l'ha fàa caporálin
de tant che l'era piscinin
de tant che l'era piscinin.
Con 'na brassa de ramètt
l'ha fàa foeura on bel s'ciopétt
ghe l'ha dàa al sò fradellin
per tiràgh a l'usellin
quand l'andava al boschettin
de tant che l'era piscinin
de tant che l'era piscinin.
Ona sègia de calcina
l'ha serví a fa la cassinna
n'ha 'vanzàa ancamò on cicin
l'ha fàa foeura on casottin
de mètt dent el porscellin
che '1 pareva on formighin
de tant che l'era piscinin
de tant che l'era piscinin.
De tant piscinin che l'era
el dormiva volentera
el dormiva sú on cossin
cont insèmma el fradellin
fàven giò el sò sognettin
che paréven poresin
de tant che eren piscinin
che paréven poresin
de tant che eren piscinin.


LASSA PUR CH'EL MOND EL DISA
(G.D'Anzi - A.Bracchi)

Se sa che a parlà de Milan se fa minga fadiga,
con tanti argoment per i man el discors el scarliga
ciapèm per esempi i semafor che grand meraviglia
te par de vedè tanta gent a ballà la quadriglia
Lassa pur ch'el mond el disa
ma Milan l'è un gran Milan
Pòrta Cicca e la Bovisa
che d'intorni pròpi san
e la nebbia che bellezza,
la va giò per i polmon
e quand fiòcca che gioia
gh'é el parco e i bastion
per scià senza andà al Mottaron
fa nagòtt se poeu pieuv
e andemm giò a tomburlon
in la puccia a puccià el panetton.
Se sa che a Milan gh'é in progett la metropolitana
però ògni dì sto progett semper pu el se `lontana
in cambi num s'em che in pittura Milan la fa scoeula
gh'è d'intorna domá cartellon del formagg Gorgonzoeula.
Lassa pur ch'el mond el disa
ma Milan l'è un gran Milan
el Carrobi e la via Brisa
el carrett di ciapa can
se te ve sul Montemerlo
par de vess a San Vincent
còssa l'è Montecarlo, San Remo, Menton
in confront de l'Olona e el Tombon
a Paris gh'è la Senna e'l Danubi l'è blu
ma a Milan gh'è el Navili e poeu pù.
Lassa pur ch'el mond el disa
ma Milan l'è un gran Milan
on bel piatt de busecca con dent i borlòtt
on oss buss cont intorna el risòtt
on litròtt de quel bon cont on bel minestron
fan content ògni milaneson.